MERHABA

Merhaba, ey ayn-ı zât'ın mazhar ü mihmanesi
Zat-ı pâk'inden görünür, nûr-ı Hakk'ın şûlesi
Rehber-i dergâh-ı izzet olduğuyçün ey Habîb
Enbiyâ vü evliyanın oldu babın kıblesi.

Aşkına gönül veren bulsa aceb değil murad
Çün cemalin şem-i Hakk'tır ehl-i Hakk pervanesi
Dü cihan buldu nizamı feyz-i pakinden Şehâ
Unsur-ı hassın olubdur gevher-i yekdânesi.


Eyle boynuma hamâyıl aşkının zincirini,
Olmasın bendsiz Habîba aşkının divânesi.
Vâridat-ı veddinün kalbi imaret ideli
Kenz-i aşk olmuşdurur bu gönlümün viranesi.

Nakd-i cânı vasl-i canâne feda ettim Velî
Ger ola yüz bin feda olmak anın şükranesi
Fenn-i aşk içre terakki kıl taleb ağyar-ı Hakk
Aşık'ın yari olımaz vasl-ı Hakk bîgânesi

Ey gönül, yarinden alıbilmek isteyen haber
Terk-i kevneyn idüb oldu rah-ı Hakk merdanesi
Bula Bayramî visalin lezzetinde kurb-i üns
Ey olan bayramı kalbinde dolu cânânesi.

HACI BAYRAM-I VELÎ (K.S.)